നിലമ്പൂര്‍ പഡുക്ക ഫോറസ്റ്റ് സ്റ്റേഷനിലേക്ക് എ.ഐ.വൈ.എഫ് പ്രതിഷേധ പ്രകടനം നടത്തി. കാട്ടില്‍ മാവോയിസ്റ്റുകളെ വെടിവെച്ചു കൊന്ന സ്ഥലത്തേക്ക് കടന്നുചെന്ന് ജനകീയ വിചാരണ നടത്താനുള്ള എ.ഐ.വൈ.എഫ് പ്രവര്‍ത്തകരുടെ നീക്കം പോലീസ് അനുവദിച്ചില്ല. ഫോറസ്റ്റ് സ്റ്റേഷന് 50 മീറ്റര്‍ അകലെ വച്ചു പ്രകടനം പോലീസ് ബാരിക്കേഡ് സ്ഥാപിച്ച് തടഞ്ഞു. തുടര്‍ന്ന് പ്രവര്‍ത്തകര്‍ റോഡില്‍ കുത്തിയിരുന്ന് പ്രതിഷേധിച്ചു. എ.ഐ.വൈ.എഫ് സംസ്ഥാന സെക്രട്ടറി മഹേഷ് കക്കട്ടില്‍ പ്രതിഷേധ പ്രകടനം ഉദ്‌ഘാടനം ചെയ്തു. പൊലീസ് മാവോയിസ്റ്റുകളെ വെടിവെച്ചു കൊല്ലാന്‍ ഉന്നതപൊലീസ് അധികൃതരുടെ അനുവാദം കാത്തു മണിക്കൂറുകള്‍ നിന്നെന്ന് മഹേഷ് കക്കട്ടില്‍ ആരോപിച്ചു.
