വയനാട്: വൈത്തിരിയില് കഴിഞ്ഞ ദിവസം നടന്ന വെടിവെപ്പിന് ശേഷം രക്ഷപ്പെട്ട മാവോയിസ്റ്റുകള്ക്ക് വേണ്ടി വയനാട് ജില്ലയിലെ മുഴുവന് വനങ്ങളിലും തണ്ടര്ബോള്ട്ട് ഇന്ന് മുതല് തിരച്ചില് തുടങ്ങും.
ഉപവന് റിസോര്ട്ടില് നടന്ന വെടിവെപ്പിനുശേഷം ചന്ദ്രുവും ബാക്കിയുള്ള 9 പേരും ഓടിക്കയറിയത് റിസോര്ട്ടിന് പുറകിലുള്ള വനത്തിലേക്കാണ്. കാലിന് ഗുരുതര പരിക്കേറ്റിരിക്കുന്നതിനാല് ചന്ദ്രുവിന് ദൂരേക്ക് യാത്രചെയ്യാനാവില്ലെന്നായിരുന്നു പൊലീസ് നിഗമനം, ഇതിന്റെ അടിസ്ഥാനത്തില് റിസോര്ട്ടിന് പുറകില് സുഗന്ധഗിരി വരെയുള്ള 15 കിലോമീറ്റര് വനത്തിനുള്ളില് രണ്ട് ദിവസം തണ്ടര്ബോള്ട്ട് പരിശോധന നടത്തി.
മാവോയിസ്റ്റുകള് സ്ഥിരമായി വനത്തിനുള്ളില് താമസിക്കാറുള്ള സ്ഥലങ്ങളെല്ലാം നശിപ്പിച്ച നിലയിലാണ്. സുഗന്ധഗിരി വഴി നിലമ്ബൂരേക്കോ കുറ്റിയടിയിലേക്കോ അല്ലെങ്കില് ജില്ലയിലെ മറ്റേതെങ്കിലും വനത്തിനുള്ളിലേക്കോ മാറിയിരിക്കാമെന്നാണ് പൊലീസ് കരുതുന്നത്.
സംസ്ഥാന അതിര്ത്തിയില് കര്ണാടകവും തമിഴ്നാടും പ്രത്യേക പരിശോധന തുടങ്ങിയിട്ടുണ്ട്. കര്ണാടകത്തിലെ കുടക് ചാമരാജ് നഗര് ജില്ലകളിലെ വനമേഖലകളില് ആന്റി നസ്കസ് സ്ക്വാഡ് ഇന്ന് മുതല് പരിശോധന തുടങ്ങും.