കാസര്‍കോട് : സംസ്ഥാനത്ത് ആദ്യമായി, ജില്ലയിലെ എന്‍ഡോസള്‍ഫാന്‍ ബാധിത പ്രദേശങ്ങളിലെ ബഡ്സ് സ്‌കൂളുകളിലെ കുട്ടികള്‍ക്കായി സ്പെഷ്യല്‍ ന്യൂട്രിമിക്സ് വിതരണം ചെയ്യുന്നു. ജില്ലയിലെ 10 ബഡ്സ് സ്‌കൂളിലെ മുഴുവന്‍ കുട്ടികള്‍ക്കും സ്പെഷ്യല്‍ ന്യൂട്രിമിക്സ് നല്‍കും. ബഡ്സ് സ്‌കൂളുകളില്‍ എത്തുന്ന എല്ലാവര്‍ക്കും പ്രായഭേദമന്യേ, പ്രത്യേകം തയ്യാറാക്കിയ പോഷകാഹാരം നല്‍കാനാണ് തീരുമാനം.
ജില്ലാ ഐ.സി.ഡി.എസും സി.പി.സി.ആര്‍.ഐയും സംയുക്തമായാണ് പോഷകാഹാരം തയ്യാറാക്കുക. സ്പെഷ്യല്‍ പോഷകാ ഹാരത്തിനൊപ്പം ഇവര്‍ക്ക് അങ്കണവാടികളില്‍ വിതരണം ചെയ്ത് വരുന്ന ന്യൂട്രിമിക്സും വിതരണം ചെയ്യും. ആറ് മാസത്തെ പഠനത്തിന് ശേഷം ജില്ലയില്‍ ഗുരുതര പോഷകാഹാര കുറവ് നേരിടുന്ന ആറ് മാസം മുതല്‍ മൂന്ന് വയസ്സ് വരെയുള്ള കുഞ്ഞുങ്ങള്‍ക്കും ഇത് വിതരണം ചെയ്യും. പ്രായത്തിന് അനുസൃതമായി വിവിധ അളവുകളിലാണ് പോഷകാഹാരം ലഭ്യമാക്കുക. പഞ്ചായത്ത് പ്ലാന്‍ഫണ്ട് ഉപയോഗിച്ച് തയ്യാറാക്കുന്ന പോഷകാഹാരത്തിന്റെ നിര്‍മ്മാണ വിതരണ ചുമതല കുടുംബശ്രീക്കാണ്.
എല്ലാ അങ്കണവാടികളിലും പോഷകത്തോട്ടം
സമ്പുഷ്ട കേരളം പദ്ധതിയുടെ ഭാഗമായി നടപ്പിലാക്കുന്ന പോഷകത്തോട്ടം ജില്ലയിലെ മുഴുവന്‍ അങ്കണവാടികളിലും ആരംഭിക്കും. മാതൃക പോഷകത്തോട്ടം കാസര്‍കോട് കളക്ട്രേറ്റ് പരിസരത്തും ഒരുക്കും. കളക്ടറേറ്റ് കോണ്‍ഫറന്‍സ് ഹാളില്‍ നടന്ന യോഗത്തില്‍ ജില്ലാ കളക്ടര്‍ ഡോ.ഡി സജിത് ബാബു അധ്യക്ഷനായി. എ.ഡി.എം. എന്‍.ദേവീദാസ്, ഐ.സി.ഡി.എസ് പ്രോഗ്രാം ഓഫീസര്‍ കവിതാറാണി രഞ്ജിത്ത്, സി.ഡി.പി.ഒ ഷിന്‍സി ഐസക്, ഡി.എം.ഒ പ്രതിനിധി ഡോ. മുരളി നല്ലുരായ. എ, സി.പി.സി.ആര്‍.ഐ പ്രതിനിധി ഡോ. നിലോഫര്‍ ഇല്യാസ്‌കുട്ടി, ജില്ലാ പഞ്ചായത്ത് പ്രതിനിധി എന്നിവര്‍ യോഗത്തില്‍ പങ്കെടുത്തു.
