തിരുവനന്തപുരം : സംസ്ഥാനത്തെ ദേശീയപാത വികസനത്തിനായി അലൈന്മെന്റില് മാറ്റം വരുത്താനാവില്ലെന്ന് കേന്ദ്രമന്ത്രി നിതിന്‍ ഗഡ്കരി. നഷ്ടപരിഹാര തുകയിലും മാറ്റം വരുത്താനാവില്ല. ദേശീയപാതയ്ക്ക് ആവശ്യമായ ഭൂമി അഞ്ച് മാസത്തിനകം ഏറ്റെടുത്ത് നല്‍കണമെന്നും ദേശീയപാതാ വികസന അവലോകന യോഗത്തില്‍ നിതിന്‍ ഗഡ്കരി പറഞ്ഞു. മുഖ്യമന്ത്രി, ചീഫ് സെക്രട്ടറിമാര്‍ തുടങ്ങിയവര്‍ യോഗത്തില്‍ പങ്കെടുത്തു. ദേശീയപാത അലൈന്മെന്റില് അന്തിമ രൂപരേഖ അംഗീകരിച്ചിട്ടുണ്ട്. അതനുസരിച്ച്‌ സെപ്റ്റംബറില്‍ ഭൂമി ഏറ്റെടുക്കല്‍ പൂര്‍ത്തിയാക്കണമെന്നും നിതിന്‍ ഗഡ്കരി ആവശ്യപ്പെട്ടു. എന്നാല്‍ ഒാഗസ്റ്റില്‍ ഭൂമി ഏറ്റെടുക്കല്‍ പൂര്‍ത്തിയാക്കുമെന്ന് മുഖ്യമന്ത്രി പിണറായി വിജയന്‍ കേന്ദ്രത്തിന് ഉറപ്പ് നല്‍കി. വടക്കന്‍ കേരളത്തില്‍ രണ്ട് മാസത്തിനകം ഭൂമിയേറ്റെടുക്കല്‍ പൂര്‍ത്തിയാക്കും. തെക്കന്‍ കേരളത്തില്‍ നാല് മാസത്തിനകം പൂര്‍ത്തിയാക്കുമെന്നും മന്ത്രി പറഞ്ഞു. നഷ്ടപരിഹാരം സംബന്ധിച്ചാണ് കേന്ദ്രത്തിന് എതിര്‍പ്പുള്ളത്. കാസര്‍ഗോഡ് 35 ഏക്കര്‍ സര്‍ക്കാര്‍ ഭൂമി കേന്ദ്രത്തിന് വിട്ടുനല്‍കി ഇത് പരിഹരിക്കുമെന്നും സുധാകരന്‍ പറഞ്ഞു.
