കോട്ടയം: മുസ്ലിംലീഗിലെ വനിതാ ലീഗ് നേതാക്കളായ ജില്ല ജന. സെക്രട്ടറി കെ.െക. ബേനസീര്‍, വൈസ് പ്രസിഡന്‍റ് ഷജില ഷരീഫ് എന്നിവര്‍ രാജിവെച്ച്‌ ഐ.എന്‍.എല്ലില്‍ ചേര്‍ന്നു. സ്ത്രീകള്‍ നേതൃസ്ഥാനത്തേക്ക് കടന്നുവരാന്‍ പാര്‍ട്ടി ആഗ്രഹിക്കുന്നില്ലെന്ന് ബേനസീര്‍ വാര്‍ത്തസമ്മേളനത്തില്‍ കുറ്റപ്പെടുത്തി.
ത്രിതല പഞ്ചായത്ത് തെരഞ്ഞെടുപ്പില്‍ ജനറല്‍ സീറ്റിലടക്കം വനിതകള്‍ മത്സരിച്ചിരുന്നു. ഇവര്‍ക്ക് പിന്തുണ നല്‍കുന്നതിനുപകരം വേറെ ആളുകളെ നിര്‍ത്തി തോല്‍പിക്കാനാണ് ശ്രമിച്ചത്. പാര്‍ട്ടിയില്‍ സ്ത്രീശാക്തീകരണം എന്ന അജണ്ട നാമമാത്രമാണ്.ജില്ലയിലെ വിവിധ മണ്ഡലങ്ങളില്‍നിന്ന് കൂടുതല്‍ ഭാരവാഹികള്‍ അടുത്ത ദിവസങ്ങളില്‍ പാര്‍ട്ടി വിടും. മറ്റ് ജില്ലകളില്‍നിന്ന് സംസ്ഥാന നേതാക്കളടക്കം പുറത്തുവരുമെന്നും ബേനസീര്‍ പറഞ്ഞു. വാര്‍ത്തസമ്മേളനത്തില്‍ ഷെജില ഷരീഫും പങ്കെടുത്തു.
