ദുബായ്: കൊല്ലം തിരുമുല്ലവാരം സ്വദേശി സി. വിദ്യാ ചന്ദ്രന്‍ (39) ആണ് മരിച്ചത്. സംഭവത്തില്‍ ഭര്‍ത്താവ് തിരുവനന്തപുരം കാരയ്ക്കാമണ്ഡപം തെക്കേവീട്ടില്‍ യുഗേഷിനെ (45) ദുബായ് പോലീസ് അറസ്റ്റ് ചെയ്തു.
തിങ്കളാഴ്ച വൈകുന്നേരം അല്‍ഖൂസില്‍ വിദ്യ ജോലിചെയ്യുന്ന സ്ഥാപനത്തിന്‍റെ കാര്‍ പാര്‍ക്കിംഗ് മേഖലയിലാണ് സംഭവമുണ്ടായത്. വിദ്യയുമായി വാക്കേറ്റത്തിലേര്‍പ്പെട്ട യുഗേഷ് കുത്തിക്കൊലപ്പെടുത്തുകയായിരുന്നു. ഓണം ആഘോഷിക്കുന്നതിനായി ചൊവ്വാഴ്ച നാട്ടിലെത്താനിരിക്കെയാണ് വിദ്യ കൊല്ലപ്പെട്ടതെന്ന് സഹോദരന്‍ വിനയചന്ദ്രന്‍ പറഞ്ഞു. ഇരുവരും തമ്മില്‍ ഏറെക്കാലമായി അത്രനല്ല അടുപ്പത്തിലായിരുന്നില്ല.
കഴിഞ്ഞ വര്‍ഷം ഭര്‍ത്താവിനെതിരേ ഗാര്‍ഹിക പീഡനത്തിന് വിദ്യ പോലീസില്‍ പരാതി നല്‍കിയിരുന്നതായും വിനയചന്ദ്രന്‍ വ്യക്തമാക്കി. അതേസമയം, സന്ദര്‍ശക വീസയിലാണ് യുഗേഷ് യുഎഇയില്‍ എത്തിയതെന്നും സൂചനയുണ്ട്.
