ബെയ്ജിംഗ് : ബെയ്ജിംഗിലെ യുഎസ് എംബസിയാണ് അമേരിക്കന്‍ വനിത ചൈനയില്‍ മരിച്ചതായി സ്ഥിരീകരിച്ചത് വുഹാനില്‍ ചികിത്സയിലായിരുന്ന 60 വയസുകാരിയാണ് മരിച്ചതെന്ന് ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തു.
ചൈനയില്‍ കൊറോണ ബാധിച്ച്‌ മരിക്കുന്ന ആദ്യ വിദേശിയാണിവര്‍. അതേസമയം, വുഹാനില്‍ ഒരു ജപ്പാന്‍ പൗരന്‍ മരിച്ചതും സംശയത്തിന് ഇടയാക്കിയിട്ടുണ്ട്.
ജപ്പാനീസ് വിദേശകാര്യ മന്ത്രാലയമാണ് മരണവിവരം പുറത്തുവിട്ടത്. എന്നാല്‍ ഇയാള്‍ കൊറോണ വൈറസ് ബാധിച്ചാണോ മരിച്ചതെന്ന കാര്യം സ്ഥിരീകരിച്ചിട്ടില്ല.ചൈനയില്‍ കൊറോണ ബാധിച്ച്‌ മരിച്ചവരുടെ എണ്ണം 722 ആയി ഉയര്‍ന്നിട്ടുണ്ട്. വെള്ളിയാഴ്ച മാത്രം 86 പേരാണ് മരണത്തിന് കീഴടങ്ങിയത്.
34,546 പേര്‍ക്കാണ് ഇതുവരെ വൈറസ് ബാധ സ്ഥിരീകരിച്ചത്. വുഹാന്‍ പ്രവശ്യയിലാണ് ഏറ്റവുമധികം മരണം നടന്നത്. രോഗവ്യാപനം തടയാന്‍ ഇവിടെ കര്‍ശന നിയന്ത്രണങ്ങളാണ് ഏര്‍പ്പെടുത്തിയിരിക്കുന്നത്.
