ന്യൂഡല്ഹി: അയോധ്യ ഭൂമിതര്ക്ക കേസ് സുപ്രീം കോടതി ഭരണഘടനാ ബെഞ്ചിന്. ചീഫ് ജസ്റ്റീസ് രഞ്ജന് ഗോഗോയ് അധ്യക്ഷനായ അഞ്ചംഗ ഭരണഘടനാ ബെഞ്ചാണ് കേസ് പരിഗണിക്കുന്നത്. ചീഫ് ജസ്റ്റീസിന് പുറമെ, ജസ്റ്റീസുമാരായ എസ്.എ ബോബ്ഡെ, എന്.വി രമണ, യു.യു ലളിത്, ഡി.വൈ ചന്ദ്രചൂഡ് എന്നിവരാണ് ബെഞ്ചിലുള്ളത്. കേസില് വാദം കേള്ക്കുന്നതിനുള്ള തീയതി വരുന്ന വ്യാഴാഴ്ച പ്രഖ്യാപിക്കും.
കേസില് ജനുവരി 10 ന് വാദം കേള്ക്കല് തീയതി പ്രഖ്യാപിക്കുമെന്ന് കഴിഞ്ഞ വെള്ളിയാഴ്ച ചീഫ് ജസ്റ്റീസ് വ്യക്തമാക്കിയിരുന്നു. അന്ന് ഒരു മിനിറ്റ് മാത്രമാണ് കേസ് പരിഗണിച്ചത്.
അയോധ്യയിലെ 2.77 ഏക്കര് ഭൂമി സുന്നി വഖഫ് ബോര്ഡ്, നിര്മോഹി അഖാഡ, രാം ലല്ല എന്നിവര്ക്കായി വീതിച്ചു നല്കിയ അലഹാബാദ് ഹൈക്കോടതി ഉത്തരവിനെതിരേയുള്ള 13 ഹര്ജികളാണ് സുപ്രീം കോടതി പരിഗണിക്കുന്നത്. അയോധ്യ വിഷയത്തില് കേവലം ഭൂമി തര്ക്കവുമായി ബന്ധപ്പട്ട പ്രശ്നങ്ങള് മാത്രമേ പരിഗണിക്കുകയുള്ളൂ എന്നു കോടതി നേരത്തേ വ്യക്തമാക്കിയിരുന്നു.