ചെന്നൈ: സ്വതന്ത്ര ഇന്ത്യയിലെ ആദ്യ ഭീകരവാദി ഗാന്ധിജിയെ വധിച്ച നാഥുറാം ഗോഡ്സെ എന്ന ഹിന്ദുവായിരുന്നെന്ന തന്റെ പരാമര്ശം ചരിത്രസത്യമെന്ന് നടന് കമല്ഹാസന്. നിയമസഭാ ഉപതെരഞ്ഞെടുപ്പ് നടക്കുന്ന തിരുപ്പന്കുണ്റം മണ്ഡലത്തില് പ്രചാരണം നടത്തുമ്ബോഴാണ് കമല്ഹാസന് ഇക്കാര്യം വ്യക്തമാക്കിയത്.
ഗോഡ്സെയെക്കുറിച്ച് താന് പറഞ്ഞത് ചരിത്ര സത്യം മാത്രമാണെന്നും അതില് എന്തിനാണ് ചിലര്ക്ക് അതൃപ്തിയെന്നും കമല്ഹാസന് ചോദിച്ചു. ആരെയും വേദനിപ്പിക്കുന്നവിധത്തില് താന് സംസാരിക്കാറില്ലെന്നും ജനങ്ങളുമായി താന് ബന്ധപ്പെടുന്നത് തടയാനാണ് ഇപ്പോള് ചിലര് ശ്രമം നടത്തുന്നതെന്നും അദ്ദേഹം പറഞ്ഞു. അതേസമയം, വിവാദ പ്രസ്താവനയില് കമല്ഹാസനെതിരെ കേസെടുത്തിട്ടുണ്ട്. ഹിന്ദു സംഘടനകളുടെ പരാതിയില് തമിഴ്നാട്ടിലെ അറവാകുറിച്ചി പോലീസാണ് കമലിനെതിരെ കേസ് രജിസ്റ്റര് ചെയ്തത്. വര്ഗീയ ധ്രുവീകരണത്തിന് ശ്രമിച്ചതടക്കമുള്ള കുറ്റങ്ങള് കേസില് ഉള്പ്പെടുത്തിയിട്ടുണ്ട്.