കൊച്ചി: കസ്റ്റഡിയിലെടുക്കാനെത്തിയ പോലീസിനെ ആക്രമിച്ച സംഭവത്തില്‍ സഹോദരങ്ങളായ യുവാക്കളെ ചോറ്റാനിക്കര പോലീസ് അറസ്റ്റ് ചെയ്തു. തിരുവാങ്കുളം കുറ്റേഴത്ത് നിജോ ജോര്‍ജ് (30) സഹോദരന്‍ ജോജി ജോര്‍ജ്(28) എന്നിവരാണ് പിടിയിലായത്. ചോറ്റാനിക്കര വെണ്ണിക്കുളത്ത് കഴിഞ്ഞ ദിവസം രാത്രി ഏഴരയോടെ മദ്യ ലഹരിയിലായിരുന്ന രണ്ട് യുവാക്കള്‍ നാട്ടുകാരുമായി വഴക്കുണ്ടാക്കുന്നതായി അറിഞ്ഞാണ് ചോറ്റാനിക്കര പോലീസ് എത്തിയത്.
എന്നാല്‍ പോലീസിനെ കണ്ടതോടെ ഇവര്‍ അവരോടു കയര്‍ക്കുകയും, ചീത്ത വിളിക്കുകയും ചെയ്തു. ഇവരെ കസ്റ്റഡിയിലെടുത്ത് സ്റ്റേഷനില്‍ കൊണ്ടുവന്നപ്പോള്‍ സി.ഐ ഉള്‍പ്പെടെയുള്ള പോലീസുകാരെ യുവാക്കള്‍ ആക്രമിക്കുകയായിരുന്നുവെന്ന് പൊലീസ് പറഞ്ഞു. പ്രതികളെ കോടതി റിമാന്‍ഡ് ചെയ്തു.
