മുംബൈ: മുംബൈ ഇന്ത്യന്‍സിനോട് 37 റണ്‍സിനാണ് ചെന്നൈ പരാജയപ്പെട്ടത്. മുംബൈ ഉയര്‍ത്തിയ 171 റണ്‍സിന്‍റെ വിജയലക്ഷ്യം പിന്തുടര്‍ന്ന ചെന്നൈയ്ക്കു തുടക്കത്തില്‍തന്നെ കനത്ത തിരിച്ചടിയാണ് നേരിട്ടത്. സ്കോര്‍ ബോര്‍ഡ് ആറ് റണ്‍സില്‍ എത്തിയപ്പോള്‍തന്നെ ചെന്നൈയുടെ ഓപ്പണര്‍മാര്‍ പവലിയന്‍ കയറി. അംബാട്ടി റായിഡു പൂജ്യത്തിനും വാട്സണ്‍ അഞ്ച് റണ്‍സിനുമാണ് പുറത്തായത്. റെയ്നയ്ക്കും (16) കാര്യമായി സംഭവന ചെയ്യാന്‍ സാധിച്ചില്ല.
കേദാര്‍ ജാദവിനു മാത്രമാണ് ചെന്നൈ നിരയില്‍ തിളങ്ങാനായത്. 54 പന്തില്‍ ഒരു സിക്സും എട്ട് ഫോറും ഉള്‍പ്പെടെ 58 റണ്‍സെടുത്ത ജാദവാണ് ടോപ്പ് സ്കോറര്‍. 12 റണ്‍സെടുത്ത ധോണിയെ ഹാര്‍ദിക് പാണ്ഡ്യ പുറത്താക്കി. പിന്നാലെ ജാദവിനെ മലിംഗയും വീഴ്ത്തി. ഇതോടെ ചെന്നൈയുടെ പതനം പൂര്‍ത്തിയായി. ചെന്നൈ നിരയില്‍ നാല് പേര്‍ക്കു മാത്രമാണ് രണ്ടക്കം കടക്കാന്‍ സാധിച്ചത്. മൂന്ന് വീക്കറ്റ് വീതം വീഴ്ത്തി ഹാര്‍ദിക് പാണ്ഡ്യയും മലിംഗയുമാണ് ചെന്നൈയുടെ നടുവോടിച്ചത്. ജയ്സണ്‍ ബെഹ്റെന്‍ഡോര്‍ഫ് രണ്ട് വിക്കറ്റ് വീഴ്ത്തി.
നേരത്തെ, സൂര്യകുമാര്‍ യാദവിന്‍റെ അര്‍ധസെഞ്ചുറിയുടെ മികവിലാണ് മുംബൈ 170 റണ്‍സെടുത്തത്. സൂര്യകുമാര്‍ യാദവ് 43 പന്തില്‍ ഒരു സിക്സും എട്ട് ഫോറും അടക്കം 59 റണ്‍സ് നേടി ടോപ് സ്കോററായി. കൃണാല്‍ പാണ്ഡ്യ 32 പന്തില്‍ 42 റണ്‍സ് സ്വന്തമാക്കി. ഇരുവരും നാലാം വിക്കറ്റില്‍ 62 റണ്‍സ് കൂട്ടിച്ചേര്‍ത്തു. ഏഴ് പന്തില്‍ രണ്ട് സിക്സ് ഉള്‍പ്പെടെ 17 റണ്‍സുമായി പൊള്ളാര്‍ഡും എട്ട് പന്തില്‍ മൂന്ന് സിക്സും ഒരു ഫോറും അടക്കം 25 റണ്‍സുമായി ഹാര്‍ദിക് പാണ്ഡ്യയും പുറത്താകാതെനിന്നു.
ഡ്വെയ്ന്‍ ബ്രാവോ എറിഞ്ഞ 20-ാം ഓവറില്‍ കിറോണ്‍ പൊള്ളാര്‍ഡും ഹാര്‍ദിക് പാണ്ഡ്യയും ചേര്‍ന്ന് 29 റണ്‍സാണ് അടിച്ചുകൂടിയത്. ഇതാണ് മത്സരത്തില്‍ നിര്‍ണായകമായത്.
