കൊച്ചി : ഗായകന്‍ എം ജി ശ്രീകുമാറിനെതിരെ വിജിലന്‍സ് അന്വേഷണം. കായല്‍കയ്യേറ്റ വിഷയത്തില്‍ എം.ജി ശ്രീകുമാറിനെതിരെ ഉയര്‍ന്ന ആരോപണം അന്വേഷിക്കാന്‍ മൂവാറ്റുപുഴ വിജിലന്‍സ് കോടതി ഉത്തരവിട്ടു. ത്വരിതാന്വേഷണം നടത്തി റിപ്പോര്‍ട്ട് നല്‍കാനാണ് കോടതി നിര്‍ദേശിച്ചത്. കളമശേരി സ്വദേശി ഗിരീഷ് ബാബു നല്‍കിയ പരാതിയിലാണ് കോടതി നടപടി. ഫെബ്രുവരി 19നു മുമ്ബ് അന്വേഷിച്ച്‌ റിപ്പോര്‍ട്ട് നല്‍കാനാണ് കോടതിയുടെ നിര്‍ദേശം.
എം.ജി ശ്രീകുമാര്‍ ബോള്‍ഗാട്ടി പാലസിന് സമീപം വാങ്ങിയ 11.50 സെന്റ് സ്ഥലത്ത് കായല്‍കയ്യേറ്റം നടത്തിയെന്നാണ് ആരോപണം. ഇവിടെ തീരദേശ പരിപാലന ചട്ടം ലംഘിച്ചും കേരള പഞ്ചായത്ത് രാജ് നിര്‍മ്മാണ ചട്ടം ലംഘിച്ചും കെട്ടിട നിര്‍മ്മാണം നടത്തിയെന്നു പരാതിയില്‍ പറയുന്നു. മുളവുകാട് പഞ്ചായത്ത് അസിസ്റ്റന്റ് എഞ്ചിനീയര്‍ ഇതിനു അനുമതി നല്‍കിയത് നിയമവിരുദ്ധമായിട്ടാണ്. ഇതിനു എതിരെ പഞ്ചായത്ത് സെക്രട്ടറി യാതൊരു നടപടിയും സ്വീകരിച്ചില്ലെന്നും ഗിരീഷ് ബാബു കോടതിയെ അറിയിച്ചു.
