കണ്ണൂര്: ബിജെപി സംസ്ഥാന പ്രസിഡന്റ് കുമ്മനം രാജശേഖരനെതിരേ കേസ്. കണ്ണൂര് രാമന്തളിയില് ആര്എസ്എസ് പ്രവര്ത്തകന് കൊല്ലപ്പെട്ട സംഭവത്തിനു പിന്നാലെ സിപിഎം പ്രവര്ത്തകരുടെ ആഹ്ലാദപ്രകടനം എന്ന പേരില് ട്വിറ്ററില് വ്യാജവീഡിയോ പോസ്റ്റ് ചെയ്തതിന്റെ പേരിലാണ് കുമ്മനത്തിനെതിരേ കണ്ണൂര് ടൗണ് പോലീസ് കേസെടുത്തത്. വീഡിയോ വ്യാജമാണെന്ന് പോലീസ് വ്യക്തമാക്കിയിരുന്നു. ഇതേതുടര്ന്നാണ് നടപടി. ആര്എസ്എസ് പ്രവര്ത്തകനായ ബിജു കൊല്ലപ്പെട്ട സംഭവവുമായി ബന്ധപ്പെട്ടു ബിജെപി സംസ്ഥാന പ്രസിഡന്റ് കുമ്മനം രാജശേഖരന് സമൂഹമാധ്യമങ്ങളിലിട്ട കുറിപ്പും ചിത്രങ്ങളും നിയമവിരുദ്ധമാണെന്നും ഇതു പരിശോധിച്ച് ആവശ്യമെങ്കില് കേസെടുക്കാനും പോലീസിനു മുഖ്യമന്ത്രി പിണറായി വിജയന് നിര്ദേശം നല്കിയിരുന്നു. നിലപാടില് ഉറച്ചു നില്ക്കുന്നതായി കുമ്മനം വ്യക്തമാക്കിയെങ്കിലും ആഹ്ലാദപ്രകടനം എവിടെ നടന്നുവെന്നു വ്യക്തമാക്കാന് ഇതേവരെ കുമ്മനത്തിനു കഴിഞ്ഞിരുന്നില്ല.