തിരുവനന്തപുരം: കോവിഡ്- 19 വൈറസ് വ്യാപനവും തുടര്‍ന്നുണ്ടായ സംഭവങ്ങളും മൂലം സംസ്ഥാനത്തിന്‍റെ സാമ്പത്തിക മേഖല തകര്‍ന്നെന്ന് മുഖ്യമന്ത്രി പിണറായി വിജയന്‍. ടൂറിസം മേഖലയ്ക്കും വന്‍ തകര്‍ച്ചയാണ് നേരിട്ടതെന്നും അദ്ദേഹം പറഞ്ഞു. ഇത്തരം സന്ദര്‍ഭങ്ങളില്‍ വിദേശികളോട് മാന്യമായി പെരുമാറണമെന്നും മുഖ്യമന്ത്രി നിര്‍ദേശിച്ചു. വിദേശ വനിതയെ ബസില്‍ നിന്ന് ഇറക്കിവിട്ട തരത്തിലുള്ള നടപടികള്‍ ഇനി ആവര്‍ത്തിക്കരുതെന്ന് പിണറായി കര്‍ശന നിര്‍ദേശം നല്‍കി. ഇത്തരം സംഭവങ്ങള്‍ സംസ്ഥാനത്തിന്‍റെ പ്രതിച്ഛായ തന്നെ നശിപ്പിക്കുമെന്ന് പറഞ്ഞ മുഖ്യമന്ത്രി അങ്ങനെയുള്ള മനുഷ്യത്വരഹിതമായ പ്രവൃത്തികള്‍ക്കെതിരെ കര്‍ശന നടപടികളുണ്ടാകുമെന്നും അറിയിച്ചു.
