കൊല്ലം: കൊല്ലം ശക്തികുളങ്ങര അമോണിയം പ്ലാന്റില്‍ ചോര്‍ച്ച. കപ്പിത്താന്‍സ് നഗറിന് സമീപമുള്ള പ്ലാന്റിലാണ് ചോര്‍ച്ച ഉണ്ടായത്. വിഷവാതകം ശ്വസിച്ച നാലുപേരെ ആശുപത്രിയില്‍ പ്രവേശിപ്പിച്ചു.തിങ്കളാഴ്ച ഉച്ചയ്ക്ക് ഒന്നരയോടെ ആയിരുന്നു സംഭവം. ഈ സമയത്ത് പ്ലാന്റിന് സമീപത്ത് ആറു ജീവനക്കാരാണ് ഉണ്ടായിരുന്നത്. ഇവരില്‍ നാലുപേര്‍ക്കാണ് പരുക്കേറ്റത്. സംഭവത്തെ തുടര്‍ന്ന് പാന്റിന് സമീപത്തു കൂടിയുള്ള ഗതാഗതം താത്കാലികമായി നിയന്ത്രിച്ചിട്ടുണ്ട്. പോലീസും ഫയര്‍ഫോഴ്സും സ്ഥലത്തെത്തിയിട്ടുണ്ട്. ചോര്‍ച്ച അടയ്ക്കാനുള്ള ശ്രമങ്ങള്‍ പുരോഗമിച്ചുവരികയാണ്.സംഭവത്തിന് പിന്നാലെ സമീപത്തെ വീടുകളില്‍ നിന്നും ആളുകളെ ഒഴിപ്പിക്കുന്നുണ്ട്.
