ചെന്നൈ: അണ്ണാഡിഎംകെ നേതാവ് വി.കെ.ശശികലയുടെ ഭര്ത്താവ് എം.നടരാജന് (76) അന്തരിച്ചു. ചെന്നൈയിലെ ഗ്ലെനീഗിള്സ് ഗ്ലോബല് ആശുപത്രിയിലായിരുന്നു അന്ത്യം. ശ്വാസകോശത്തിലെ അണുബാധയെ തുടര്ന്ന് ചികിത്സയിലായിരുന്നു. കഴിഞ്ഞ ഒക്ടോബറില് കരള്, വൃക്ക മാറ്റിവെയ്ക്കല് ശസ്ത്രക്രിയയ്ക്ക് വിധേയനായ നടരാജനെ രണ്ടാഴ്ച മുന്പാണ് വീണ്ടും ആശുപത്രിയില് പ്രവേശിച്ചത്. മാറ്റിവച്ച വൃക്കയും കരളും പ്രവര്ത്തനരഹിതമാവുകയും ശ്വാസകോശ അണുബാധ മൂര്ച്ഛിക്കുകയും ചെയ്തിരുന്നു. വെന്റിലേറ്ററിന്റെ സഹായത്തിലാണ് ജീവന് നിലനിര്ത്തിയിരുന്നത്. വര്ഷങ്ങളായി പൊതുരംഗത്ത് സജീവമല്ലാത്ത നടരാജന് മുഖ്യമന്ത്രിയായിരുന്ന ജയലളിതയുടെ മരണ ശേഷമാണ് വീണ്ടും പ്രത്യക്ഷപ്പെട്ടത്. എഐഎഡിഎംകെയുടെ പ്രവര്ത്തനങ്ങളില് ഇടപെട്ടിരുന്നില്ലെങ്കിലും ഒ.പനീര്ശെല്വം വിമതസ്വരം ഉയര്ത്തിയപ്പോഴടക്കം ശശികലയ്ക്ക് പിന്തുണയുമായി രംഗത്തെത്തിയിരുന്നു. എന്നാല് അനധികൃതസ്വത്ത് കേസില് ശിക്ഷിക്കപ്പെട്ടപ്പോള് പാര്ട്ടി നേതൃത്വം സഹോദരീപുത്രന് ടി.ടി.വി.ദിനകരനെയാണ് ശശികല ഏല്പ്പിച്ചത്.